Schlagartig iss merr 100 (Hunnert) Kaum, daß die Eltern glücklich worn dut's en Schlag - merr iss geborn! Friedlich liegt merr do un pennt, die ganz Verwandtschaft kimmt gerennt, merr werd gebobbelt un bewunnert: Stramm iss des Kind! Ei, des werd Hunnert! Laafe lernt merr dann un schwätze, kann mer's, muß merr still sich setze; im Kinnergarte, in de Schul hockt merr brav dann uff em Stuhl. Die Tortur geschieht fast täglich manchmal isses unerträglich, doch - wie im Wind - die Johrn vergehn; es dut en Schlag - un merr iss zehn! Weiter schleppt merr müd den Ranze, lernt rechne, schreiwe, radfohrn, tanze, die ganz Woch schafft merr immerzu, nur am Sonntag hott merr Ruh; rausgeputzt denkt merr: Jetzt tanz ich... do dut's en Schlag - un merr iss zwanzig! Kaum daß die Lieb iss angeleiert, werd geküßt, verlobt, geheiert, ohne recht zu wisse wie, sitzt was Klaanes uffem Knie, Um die Klee ernährn zu könne, muß merr uff die Aweit renne. Munter hippt merr wie en Zeisig, do dut's en Schlag - un merr iss dreißig! Weiter rennt un raast die Zeit, mim Erfolg kimmt aach de Neid. Hott merr ebbes, iss merr wer, schießt selbst die Verwandtschaft quer, jeder denkt, dem geht's viel besser, dem sei Häusche, dess iss größer, dem sei Kinner, die studiern, un indem merr am sinniern, sieht nur annern ihrns gewürzig, do dut's en Schlag - un merr iss vierzig! Aach die Halbzeit iss jetzt do, registriert merr, feiert froh, vierzig, dess iss doch kaa Alter, fröhlich hippt merr wie en Falter, harkt im Garte - gießt un mäht, Herrjesses, wie die Zeit vergeht, fast lautlos Johr um Johr verduft sich, do dut's en Schlag - un merr iss Fuffzig! Tickt nitt schneller jetzt die Uhr? Mancher doktert, muß in Kur, ob in der Fern, ob im Kabuff, jedem zählt sei Leid er uff, jedem macht er alles her, kaaner iss so krank wie er. Am wohlste fühlt er sich im Bett, ach, wenn er nur sei Rente hätt! Flugs davon die Zeit, sie mecht sich, es dut en Schlag - un merr iss sechzig! Die Baa wern langsam schwer und schlapper, die Hoorn wern lichter, Zähn wern knapper, die Haut iss merklich am verwelke; die Doktor hawwe fest zu melke, de Kreislauf macht nitt mehr recht mit, Haspel esse, soll merr nitt! Schweinefleisch wär ungesund, viele Leut wärn viel zu rund. Von wege Zeit im Iwwerfluß, jed Wocheend geht's ab mim Bus, bei Angler-, Hinkel-, Straßefeste kann merr sich die Wampe mäste. Torte, Pommes, Schnitzel - große! - de Zucker steigt ins Uferlose. Die Uhr sie tickt un tickt un tickt... Obwohl des Rheuma reißt un zwickt, fühlt sich mancher wirrer jung, denkt an Sex un Seitesprung. Er zieht los, hebt ab, verhippt sich... Do dut's en Schlag - un er iss siebzig! Siebzig... Jesses raast die Zeit ab in Richtung Ewigkeit! Noch stillt merr sein Fernweh-Dünkel, gießt un häkelt, füttert Hinkel, schlabbert öfter mal en Woi, nickt beim Fernseh meistens ei, Selbst die Matschos wern jetzt kränklich, mancher fromm un gor bedenklich, hinner aam hängt lahm die Sippe, öfter kriet merr Krampf un Grippe, in de Hoffnung, ach, dess macht sich!, dut's en Schlag - un merr iss achtzig! Achtzig Johr! 'S iss nitt zu fasse! Freilich, achtzig wern iss Klasse! Öfters muß merr sich jetzt setze. Stille fange an zu schwätze, wer gern laut un viel geredd, der wird leiser, lieb un nett, schlurft enaus zum Frischluftschnappe, am liebste laaft merr jetzt in Schlappe. E bissje Aweit macht noch Spaß, dreimal täglich kehrt merr Gass, komme ab un zu die Enkel, motzt merr, stellt se hieh in Senkel; trotzdem füllt merr'n gern die Händ, merr braucht se doch nitt mehr - die Rent. Weil die Knoche müd un lahm bleibt merr liewer jetzt dehaam. Merr bejammert un begreint sich, do dut's en Schlag - un merr iss neunzig! Neunzig... Ach ihr liewe Leit, kaaner hott mehr für aam Zeit, nur gut, daß es en Fernseh gitt, es meiste kriet merr gornitt mit. Nix mehr Urlaub, nix mehr Kur, de letzte Sand rinnt dorch die Uhr, guckt merr die Straß mal hin un her, ei, merr kennt jo gar kaan mehr! Während aam schon nix mehr wunnert, dut's en Schlag - un merr iss hunnert! Ach, du liewer Himmel...hunnert! Merr wird gefilmt - merr wird bewunnert, die Presse kimmt un fragt aam aus; de Landrat bringt en Blummestrauß, de Bürgermeister, den merr gornitt kennt, gratuliert mit beide Händ; schwätzt mit jedem - redde kann er! Gott, merr iss ganz dorchenanner! Jeder fragt, möcht wisse gern, wie merr's geschafft hätt, hunnert zu wern. Wie? - Dess iss ganz aafach ihr Leit, zum hunnert wern, da braucht merr Zeit! Zum hunnert wern, ei dess kost Johrn, do muß mim Kopp merr Auto fohrn, die Händ bewege un die Füß, schee langsam kaue - viel Gemüs! Für'n Dorscht allzeit e edel Gewächs, ab achzig möglichst wenig Sex; un nitt zuu sehr ans Lewe klammern, zuu viel doktern, zuu viel jammern. Nitt alles mitkrien was gebote, statt Schlaftee liewer en trockne Rote. Ganz wichtig iss, daß merr zufriede, egal was merr hott, was aam beschiede. Was hinne liegt dess iss vorbei, jeder Tag iss schee un neu. Ihr dürft nitt unnütz Sorg euch mache, vergeßt nitt jeden Tag zu lache, denn de Herrgott hott fröhliche Mensche gern, un e poor davon läßt er hunnert wern! Verfasser unbekannt